Bele Doette as fenestres se siet,
Lit en un livre mais au cuer ne l'en tient,
De son ami Doon li resovient
Q'en autres terres est alez tornoier.
E or en ai dol!
Uns escuiers as degrez de la sale
Est dessendu, s'est destrossé sa male.
Bele Doette les degrez en avale,
Ne cuide pas oïr novele male.
E or en ai dol!
Bele Doette tantost li demanda:
"Ou est mes sires, que ne vi tel pieç'a?"
Cil ot tel duel que de pitié ploya;
Bele Doette maintenant se pasma.
E or en ai dol!
Bele Doette s'est en estant drecie:
Voit l'escuier, vers lui s'est adrecie,
En son tuer est dolante et correcie
Por son seignor dont ele ne voit mie.
E or en ai dol!
Bele Doette li prist a demander:
"Ou est mes sires cui je doi tant amer?"
"En non Deu, dame, ne.l vos quier mais celer:
Morz est mes sires, ocis fu au joster."
E or en ai dol!
Bele Doette a pris son duel a faire:
"Tant mar i fustes, cuens Do, frans debonaire,
Por vostre amor vestirai je la haire,
Ne sor mon cors n'avra pelice vaire.
E or en ai dol!
Por vos devenrai nonne en l'eglyse saint Pol.
" Por vos ferai une abbaïe tele,
Qant iert li jors que la feste iert nomeie,
Se nus i vient qui ait s'amor fauseie,
Ja del mostier ne cavera l'entreie."
E or en ai dol!
Por vos devenrai nonne en l'eglyse saint Pol.
Bele Doette prist s'abaiie a faire,
Qui mout est grande et adés sera maire;
Toz cels et celes vodra dedanz atraire
Qui por amor sevent peine et mal traire.
E or en ai dol!
Por vostre amor devenrai nonne en l'eglyse saint Pol.
Anónimo (Sec.XII-XIII)
Sem comentários:
Enviar um comentário